ब्रेकिंग

क्रीडा

इंग्लंडच्या संघात एडी जॅकचा समावेश

Samruddhi Dhayagude
12 Jun 2025

लीडस : इंग्लंड आणि भारत यांच्यातील पाच सामन्यांची कसोटी मालिका २० जूनपासून सुरू होणार आहे. या कसोटी मालिकेपूर्वी इंग्लंडने भारताविरुद्ध खेळण्यासाठी काही योजना आखली आहे. १९ वर्षीय गोलंदाज एडी जॅकला इंग्लंड संघाने त्यांच्यासोबत सराव करण्यासाठी बोलावले आहे. जिथे संघ भारताविरुद्ध पाच कसोटी सामन्यांची तयारी करत आहे.

एडी जॅक इंडिया अ विरुद्धच्या दोन अनधिकृत सामन्यांमध्ये इंग्लंड लायन्स संघाचा भाग होता. त्याने दुसर्‍या कसोटीत केएल राहुलला आऊट करून निवडकर्त्यांचे लक्ष वेधले. त्यानंतर त्याला वरिष्ठ संघासोबत सराव करण्यासाठी बोलावण्यात आले आहे. एडी जॅक हा उंच गोलंदाज आहे. त्याची उंची ६ फूट ४ इंच आहे. अशा परिस्थितीत त्याला खेळपट्टीवर जास्त उसळी मिळते.

द टाईम्स लंडनमधील वृत्तानुसार, जॅकने इंग्लंड लायन्सकडून खेळताना खूप प्रभावित केले. जॅकने अद्याप हॅम्पशायरसाठी काउंटी चॅम्पियनशिपमध्ये पदार्पण केलेले नाही. त्याने दोन प्रथम श्रेणी सामने खेळले आहेत आणि तेही भारत अ विरुद्ध. पण, याआधी जॅकने दक्षिण आफ्रिकेविरुद्ध इंग्लंड-१९ क्रिकेट संघाचे प्रतिनिधित्व केले आहे.गेल्या महिन्यात झिम्बाब्वेविरुद्धच्या सराव सामन्यात संयुक्त काउंटी इलेव्हनकडून खेळताना जॅकने पाच विकेट्स घेतल्या. त्यानंतर जॅकने नॉर्थम्प्टनमध्ये भारताविरुद्ध नितीश रेड्डी आणि ध्रुव जुरेल यांना आऊट केले. त्यामुळे त्याला आता वरिष्ठ संघात ठेवण्यात आले आहे आणि गरज पडल्यास इंग्लंड त्याला त्यांच्या मुख्य संघातही समाविष्ट करू शकते.

आगामी कसोटी मालिकेपूर्वी इंग्लंडला वेगवान गोलंदाजी विभागात अडचणी येत आहेत. जोफ्रा आर्चर पहिल्या कसोटीतून बाहेर आहे, तर अनुभवी वेगवान गोलंदाज मार्क वूड दुखापतीमुळे संपूर्ण उन्हाळी हंगामासाठी उपलब्ध राहणार नाही. याशिवाय, तरुण वेगवान गोलंदाज गस अ‍ॅटकिन्सन देखील अद्याप पूर्णपणे तंदुरुस्त होऊ शकलेला नाही.

दोन आठवड्यांपूर्वी झिम्बाब्वेविरुद्धच्या एकमेव कसोटीत त्याला हॅमस्ट्रिंगचा त्रास झाला होता, ज्यातून तो अजूनही बरा होत आहे. अशा परिस्थितीत एडी जॅकचा संघात समावेश करण्यात आला आहे. तो पाचही सामन्यांसाठी संघासोबत प्रवास करण्याची शक्यता आहे.